Një kontroll i inspektorëve të tregut, tatimeve dhe sanitarisë në Mitrovicë të Veriut dhe Zveçan është kthyer në disa media serbe në “sulm” të Albin Kurtit ndaj serbëve.
E përditshmja beogradase Novosti e botoi lajmin të premten në mëngjes me titullin “Kurti i ra serbëve gjatë natës, njerëzit u nxorën jashtë!”. Megjithatë, në tekstin e vetë artikullit Kurti nuk përmendet asnjëherë, as ndonjë vendim apo deklaratë e tij.
Sipas Policisë së Kosovës, gjatë natës janë mbyllur shtatë lokale, pesë në Mitrovicë të Veriut dhe dy në Zveçan. Zëvendëskomandanti i Policisë për rajonin Veri, Erduan Baliqi, ka konfirmuar për portalin KoSSev se lokalet i mbyllën inspektorët e tregut dhe se nuk ka pasur asnjë person të ndaluar.
Në aksion kanë marrë pjesë Inspektorati Qendror i Mbikëqyrjes së Tregut (IQMT), inspektorati sanitar dhe Administrata Tatimore e Kosovës (ATK), ndërsa policia vetëm u ka ofruar asistencë inspektorëve.
Pjesa e titullit për “njerëzit e nxjerrë jashtë” bazohet, sipas vetë Novostit, në informacione joformale të dëshmitarëve për një lokal të vetëm, “Knez”, në shëtitoren e Mitrovicës së Veriut. Portali Objektiv, nga ana tjetër, në raportimin e tij e quan vazhdimisht policinë “e ashtuquajtura policia e Kosovës”.
Mediat e tjera serbe: lajm për inspektim, jo për Kurtin
Ndryshe nga Novosti, media si Danas, N1 dhe Nova.rs e kanë raportuar të njëjtën ngjarje si aksion inspektues, duke dhënë emrat e lokaleve të mbyllura dhe deklaratat e policisë, pa ia atribuar atë Kurtit.
Sipas Nova.rs, mes lokaleve të mbyllura janë restoranti “Queen”, kafeneja “Princip”, kafeja “Galerija”, shisha bari “Parlament” dhe restoranti “Mreža”. Nga kafeneja “Princip” kanë shkruar në Instagram se kjo është hera e dytë brenda një viti që mbyllen nga inspektorati kosovar.
Një model i përsëritur
Ky nuk është rast i izoluar. Vetëm gjatë kësaj jave, Novosti ka paraqitur si “terror të Kurtit” vendimin e gjykatës në Prishtinë për vazhdimin e paraburgimit për nëntë serbë nga Zubin Potoku, ndërsa një aksion policor në disa fshatra e ka përshkruar si “çizmen e Kurtit” mbi atë që e quan “Metohija serbe”. Në të dyja rastet, vendime të gjykatave dhe veprime të policisë u paraqitën si akte personale të Kurtit.
Kontrolle të ngjashme të lokaleve bëhen rregullisht edhe në pjesën jugore të vendit. Në maj të vitit 2025, policia dhe inspektorët komunalë kontrolluan katër lokale nate në Mitrovicë, ku dy lokaleve iu shqiptuan gjoba dhe një u mbyll përkohësisht.
Deri në publikimin e këtij lajmi, inspektoratet nuk kanë bërë publike arsyet konkrete të mbylljes së lokaleve në veri, as kohëzgjatjen e masave.
