Kryeministri i Republikës së Kosovës, Albin Kurti, ka deklaruar në mbledhjen e qeverisë se shenjat e gishtërinjve të dërguara nga Serbia, përkojnë me ato të Faton Hajrizit.
Ai tha se ato janë përcjell në Agjencinë e Kosovës për Forenzikë, teksa MPB-ja dhe Ministria e Punëve të Jashtme janë angazhuar me këtë rast, shkruan Indeksonline.
“Sqarimi i rrethanave që nga ikja në drejtim të Serbisë e deri te vrasja e tij e raportuar, kërkon një hetim vendor dhe ndërkombëtar. Ndërkohë, ftoj qytetarët e vendit tonë të mos bien pre e euforisë së heroizimit dhe romantizimit të Faton Hajrizit. Patriot në Republikën e Kosovës është rreshteri i Policisë së Kosovës, Afrim Bunjaku, janë 23 pjesëtarë të policisë, të rënë në krye të detyrës, që dëshmuan përkushtimin për shërbim, deri në sakrificë”, deklaroi kryeministri.
Ai shtoi se është e nevojshme të zbardhen rastet, si vrasja e Enver Zymberit si edhe e Afrim Bunjakut, duke kujtuar se organet akoma nuk kanë ngritur aktakuzë kundër Milan Radojçiqit, që dyshohet t’i ketë prirë grupit terrorist që kreu sulmin në Banjskë.
