Me fillimin e vitit të ri kalendarik, do të nisë edhe një fazë tjetër e procesit të dialogut ndërmjet Kosovës dhe Serbisë.
Kosova ka formuar edhe një Ekip negociator për dialogun me Serbinë, për fazën finale të këtij procesi të ndërmjetësuar nga Bashkimi Evropian. Dialogu ndërmjet dy vendeve, deri më tani është udhëhequr nga presidenti Hashim Thaçi.
Jeta Krasniqi, nga Instituti Demokratik Kosovës (KDI), thotë për Radion Evropa e Lirë, se nuk janë qartësuar mirë kompetencat se kush do ta udhëheqë delegacionin e Kosovës.
Sipas saj, pavarësisht se në ligjin e miratuar nga Qeveria e Kosovës, thuhet që delegacioni shtetëror është ai që flet në emër të Kosovës, i cili merr vendimet, gjithsesi presidenti i ka kompetencat e tij kushtetuese dhe me këtë ligj nuk mund të ndryshohet hierarkia institucionale.
Kurse, drejtori i organizatës Demokraci për Zhvillim (D4D), Shpend Emini, mendon se themelimi i Ekipit negociator, është vetëm një veprim simbolik.
