Një familje në nevojë është hequr në mënyrë abuzive nga skema e ndihmës ekonomike për një gabim të kryer nga vetë institucionet shtetërore. Djali i tij për një gabim të doganave, rezulton të jetë shef në një sektor të doganës ku rroga shkon deri në 800 mijë lekë të vjetra, çka nuk është aspak e vërtetë.
Djali është me 8 klasë shkollë dhe punon në bujqësi e blegtori, por ky gabim i administratës së Doganës i ka hequr të drejtën për të marrë 65 mijë lekëshin (të vjetra) të ndihmës ekonomike.
Teksa kryeministri Edi Rama bën propagandë të përnatshme duke postuar me foto se si deri dje abuzohej duke ju dhënë ndihma ekonomike familjeve që kishin vila, dhe se si sot qeveria e tij po kthen sytë nga të varfrit, dhjetëra mijëra familje, në realitetin që kreu i qeverisë nuk sheh, po vuajnë për bukën e gojës. Po sorollaten për të vënë drejtësi mbi gabimet e institucioneve që duhej t’i mbështesnin. Si mund të justifikohet që një familjeje të mjerë i është hequr ndihma ekonomike dhe përpos të tjerave, drejtësinë duhet ta gjejnë duke trokitur në dyer e emisioneve mediatike.
Rasti i ndjekur nga Stop ne Tv Klan
Emisioni “Stop” ka udhëtuar drejt fshatit Dome të Postribës, pasi Manush Çelaj pretendon se është hequr në mënyrë të padrejtë nga skema e ndihmës ekonomike.Në përgjigjen që ka marrë thuhet se rezulton i biri i punësuar në doganë.
Por ai, Ridvan Çelaj është me 8 klasë shkollë e nuk ka punuar asnjë ditë, as në doganë e askund tjetër.
Gazetarja e emisionit investigoi në të gjitha zyrat e shtetit, por përgjigja nuk ndryshon, djali doganier e pengon të marrë ndihmën ekonomike Manush Çelajn.
Drejtoria e Përgjithshme e Doganave tha se numri i kartës së Ridvanit është i njëjtë me punonjësin e doganave Blendin Cullhaj, ndaj ka ndodhur dhe gabimi.
“Emisionit ‘Stop’ iu drejtova sepse unë kam marrë asistencën gjatë gjithë këtyre viteve. Në fillim të vitit 2018 aplikova për letrat e asistencës, u interesova, por emri im nuk figuronte. Shkova te zotëria, i thashë si ka mundësi që emri im nuk figuron në listën e ndihmës ekonomike. Më tha: “Zotëri, ju nuk e përfitoni ndihmën ekonomike se djalin e keni të punësuar në Drejtorinë e Doganave. As adresën nuk e di se ku i bie kjo.
Në vitin 2017 kam marrë ndihmë 65 mijë lekë (të vjetra). Unë jetoj me pak blegtori e bujqësi”, u shpreh Manush Çelaj.
Ndërsa i biri, Ridvani tha: “Unë s’di gjë për atë punë, hiç bile. Kur më tregoi babi unë u habita. Unë as jam regjistruar as kam qenë, vetëm një herë në jetën time kam qenë në Doganë, jo më të jem shef dogane siç kanë thënë ata. Unë po të isha shef dogane s’do i kisha duart kështu nga lopata, si fshatar. Unë 8 klasë shkolle kam. Dogana ka goxha rrogë dhe po ta kisha, s’do isha në këtë gjendje, duke kërkuar zyrë më zyrë për 65 mijë lekë”. Ai u shpreh se ka vetëm 8 klasë shkollë, ndaj nuk ka mundësi të punojë në Drejtorinë e Përgjithshme të Doganave e aq më pak si shef.
Gazetarja e emisionit “Stop” iu drejtua Njësisë Administrative Postricë për të mësuar motivin e përjashtimit nga skema e ndihmës ekonomike familjen Çelaj.
Fiqiret Çela, specialist i ndihmës ekonomike, tha se Ridvan Çelaj rezulton në sistem si i punësuar në Drejtorinë e Përgjithshme të Doganave, ndaj dhe i është hequr ndihma ekonomike kësaj familjeje.
“Nuk e ka deklaruar që është i punësuar. Drejtoria e Shërbimit Social ka bërë verifikimin e këtyre familjeve, që kanë dalë të punësuar, me automjete, motora etj. Në njësinë tonë kanë aplikuar 712 familje, nga to janë refuzuar 183 familje. Te Shërbimi Social bëhen verifikimet për personat, nëse kanë deklaruar të vërtetën”.
Po ashtu, specialistja e Shërbimit Social Shtetëror, Edlira Cani u shpreh se në bazë të sistemit, Ridvan Çelaj rezulton i punësuar pranë Drejtorisë Përgjithshme të Doganave, çka nuk është deklaruar nga i ati në kërkesën për ndihmën ekonomike.
Rroga e zotërisë, sipas sistemit, është 73000 lekë dhe kontributet 20367 lekë”.
Ndaj dhe gazetarja e emisionit “Stop” iu drejtua Doganës Shkodër për të verifikuar nëse ekziston emri i Ridvan Çelës si i punësuar pranë këtij institucioni.
Financierja e Doganës Shkodër, Ikbal Idrizaj e mohoi këtë fakt, duke thënë se në bordero nuk ka patur asnjë person me emrin Ridvan Çelaj.
Pra, i vetmi institucion që mund të kthente një përgjigje të saktë lidhur me këtë çështje ishte Drejtoria e Përgjithshme e Doganave.
Sipas saj ka ndodhur një gabim në sistem, pasi një punonjës i kësaj drejtorie, Blendin Cullhaj ka numrin e kartës së identitetit të njëjtë me Ridvan Çelajn, por shkronjat të ndryshme. Ngatërresë kjo që ka sjellë dy problematika, mospajisjen e Ridvan Çelajt me ndihmë ekonomike, si dhe të Blendin Cullhajt me kontributet shoqërore dhe shëndetësore.
