Kryeministri i Maqedonisë së Veriut, Hristijan Mickoski, ka folur në Washington për kushtin që bullgarët të përfshihen në Kushtetutën e vendit, në kuadër të procesit të integrimit evropian, shkruan InfoShqip.
Gjatë një diskutimi në Atlantic Council, Mickoski tha se sipas regjistrimit të fundit bëhet fjalë për një komunitet prej rreth 3 mijë qytetarësh.
“Nuk po flasim për 300 mijë, as për 3 milionë, as për 300 milionë. Po flasim për 3 mijë qytetarë. Pse duhet ta bëjmë këtë?”, deklaroi Mickoski.
Ai argumentoi se bullgarët tashmë përfshihen në kategorinë “të tjerët” në Preambulën e Kushtetutës dhe e lidhi çështjen edhe me debatin për të drejtat e njeriut.
Mickoski përsëriti gjithashtu qëndrimin se procesi i anëtarësimit në Bashkimin Evropian duhet të bazohet në merita dhe jo në çështje dypalëshe. /InfoShqip.com
