Përveç deputetëve të PDK-së dhe të Aleancës, sot, në sallën e kuvendit të Kosovës pati të pranishëm edhe përfaqësues të Ambasadës së Shteteve të Bashkuara të Amerikës dhe Zyrës së Bashkimit Evropian në Prishtinë.
Ata u përshëndetën nga parlamentarë të dy partive që tashmë dy javë po vijnë në vendin e punës të të zgjedhurve të popullit, ku po kërkojnë vazhdimin e seancës konstituive, që ngeci qysh në start, më 8 gusht.
PDK dhe Aleanca po fajësojnë kryeministrin në detyrë, Albin Kurti dhe partinë e tij se kanë marrë peng Kosovën.
Deputetja Ganimete Musliu tha se Vetëvendosje ka tendenca shtet-shkatërruese dhe se po luan me besimin dhe durimin e popullit të Kosovës, por sipas saj, çdo durim e ka një fund dhe se Kosova nuk mund të pres më.
Që nga 8 gushti, Kuvendi i Kosovës nuk e ka thirrur më asnjë mbledhje për vazhdimin e seancës konstituive, ndërkohë PDK e Aleanca vazhdimisht po e kërkojnë një gjë të tillë, ndërsa Lëvizja Vetëvendosje është shprehur se pa pasur marrëveshje për president, thirrja e një seancë të tillë do të ishte parapërgatitje për zgjedhje të reja.
