Zëvendës/ndihmës Sekretari i Shtetit për Çështjet Evropiane, Matthew Palmer, më 22 tetor do të vizitojë Maqedoni për të mbështetur Marrëveshjen e Prespës midis Maqedonisë dhe Greqisë dhe në mbështetje të reformave tashme të ndërmarra nga Maqedonia.
Ai do të takohet me faktorët politikë në pushtet por edhe nga opozita, përfshirë Kryeministrin Zaev dhe ministrin e Jashtëm, Dimitrov.
Vizita e tij vjen pas letrës së ndihmës sekretarit Wess Mitchell, drejtuar liderit të VMRO-DPMNE-së, Hristijan Mickoski, në të cilën ai theksoi se Shtetet e Bashkuara janë të zhgënjyer nga qëndrimet e drejtuesve të kësaj partie, duke përfshirë edhe veten e tij personalisht, përcjell Telegrafi Maqedoni.
Letra u botua në faqen e internetit të Ambasadës Amerikane në Maqedoni.
“Siç është diskutuar tashmë, Shtetet e Bashkuara besojnë fuqimisht në atë se marrëveshja e Prespës në mes Maqedonisë dhe Greqisë është një mundësi historike për Maqedoninë për të siguruar një të ardhme të ndritshme dhe të kontribuojnë në sigurinë, stabilitetin dhe prosperitetin rajonal. Përkundër pohimeve se mund të arrihet një lloj marrëveshjeje “më të mirë”, ne nuk besojmë se është e mundur. Kjo marrëveshje është kompromis nga të dyja palët. Ky është një rast që ndoshta nuk do të përsëritet për vite, nëse jo për dekada.
Nuk do të ju habis se ne jemi të zhgënjyer nga qëndrimet e anëtarëve të VMRO-DPMNE-së, si në aspektin e referendumit dhe në lidhje me hapat në Kuvend për të ndryshuar kushtetutën. Që nga pavarësia e Maqedonisë, qytetarët nga të gjitha komunitetet dhe partitë, përfshirë tuajin, mbështesin fuqimisht pranimin e vendit në NATO dhe BE. Tani Kuvendi është në linjë për të marrë hapin tjetër, vendimtar. Ne ju nxisim që të krijoni hapësirë, në publik dhe privat, për anëtarët e koalicionit tuaj që të vendosni se si do të votojnë për ndryshimet kushtetuese, lirohuni nga kërcënimet e dhunshme, hakmarrjes ose formave të tjera të shtrëngimit”, thuhet në letrën e Mitchell dërguar Mickoskit. Në letër gjithashtu shkruhet se ky është një moment historik për vendin tuaj, moment i cili kërkon guxim dhe lidreship dhe vullnet.
