Lidhja Demokratike e Kosovës ka pranuar ftesën nga Presidenca për tu akredituar sy zyrtarë të saj si anëtar të Komisionit Qendror të Zgjedhjeve.
Florian Dushi dhe Sami Hamiti janë ftuar nga Zyra e Presidencës që të enjte të paraqiten për dekretim nga Presidenti i Kosovës, Hashim Thaçi.
Lajmin e ka konfirmuar për Gazetën Blic zëdhënësi i LDK-së, Besian Mustafa.
“Po dy të propozuarit e LDK-së, Sami Hamiti dhe Florian Dushi kanë marrë ftesë nga Presidenca e Kosovës që të enjten të dekretohen për anëtarë të ri të KQZ-së” ka thënë Mustafa.
GazetaBlic ka raportuar sot gjatë ditës, që ftesat nga Zyra e Presidentit kanë shkuar edhe tek PDK, AAK, dhe VV-ja, por jo edhe të NISMA e PSD-ja. Të dy këto parti mund të mbesin jashtë KQZ-së.
Ani pse këto dy subjekte politike kanë propozuar e dërguar emra konkretë se kush mund të jenë anëtarë të KQZ-së, megjithatë presidenti i vendit, Hashim Thaçi nuk i ka ftuar përfaqësuesit e propozuar nga këto dy parti për t’i dekretuar për të enjten, ashtu siç edhe ka paralajmëruar përmes një njoftimi për media.
