Presidenti ukrainas, Volodymyr Zelensky, ka deklaruar se Ukraina do të vendosë se kush do ta përfaqësojë Evropën në çdo negociatë me Rusinë, sipas një interviste të publikuar vonë të dielën në mediat ukrainase.
Ukraina është përpjekur të ringjallë përpjekjet diplomatike për t’i dhënë fund luftës më shumë se katërvjeçare me Rusinë duke përfshirë vendet evropiane, ndërsa negociatat e mbështetura nga SHBA-ja kanë ngecur për shkak të luftës me Iranin dhe refuzimit të Ukrainës për të pranuar kërkesat ruse për dorëzimin e territoreve të saj.
Zelensky ka thënë se çështja e Ukrainës është diskutuar “më gjerësisht se kurrë më parë” gjatë takimit të Këshillit të Evropës javën e kaluar.
“Diskutuam rolin e Evropës në dialogun me rusët dhe se cili duhet të jetë ai rol. Evropa do të shqyrtojë formatin dhe do të propozojë disa opsione, por Ukraina do të vendosë se kush do ta përfaqësojë Evropën në negociata. Kjo është e drejtë”, ka deklaruar Zelensky.
Liderët evropianë kanë filluar së fundmi të diskutojnë mundësinë e bisedimeve të drejtpërdrejta me Moskën, por mbeten të ndarë në mënyrën se si duhet të trajtohen marrëdhëniet me Rusinë.
Zelensky u ka bërë thirrje aleatëve të shtonin presionin mbi Rusinë për t’i dhënë fund luftës gjatë samitit të Grupit të Shtatë në Evian-les-Bains të Francës javën e kaluar, ku u takua me presidentin amerikan Donald Trump.
Ai ka përsëritur kërkesën që lideri amerikan të miratojë licenca për prodhimin në Ukrainë të sistemeve amerikane të raketave mbrojtëse Patriot.
Lufta me Iranin ka nxjerrë në pah mungesën globale të këtyre armëve, në një kohë kur Rusia po rrit prodhimin e raketave balistike.
“Këtë herë, për herë të parë, u bë publike se ekipi amerikan kishte dhënë një përgjigje pozitive për çështjen e licencave”, ka thënë Zelensky.
Raketat amerikane janë aktualisht arma e vetme efektive në arsenalin ukrainas për rrëzimin e raketave balistike ruse.
