Analistët mbrëmë në emisionin Click Plus e quajtën paradoks dënimin e Abdylfetah Alimit, për ngjarjet e 27 prillit. Albert Musliu shprehet i habitur për faktin se njeriu i cili i jep çelësin dënohet, ndërsa ai që e hapë derën me atë çelës shpëton.
“Ishte e pa drejtë edhe ata që u liruan dhe ato të cilët i hapën dyert sepse është pak paradoks tash, njeriu i cili i jep çelësin atij, dënohet ndërsa ai që e qel me atë çelës të njëjtës, ai shpëton. Aty është paradoksi, unë e dëgjova edhe justifikimin e gjykatëses se për shkak të veprës së mirë të cilën e ka bërë që shpëtoi kryetarin e Aleancës I është ulur dënimi”, u shpreh analisti politik, Albert Musliu.
Edhe juristja Arta Bilalli Zendeli ka dyshime për vendimin e dënimit të Alimit. Ajo thotë se në video shihet që ai po jep disa çelësa, por thotë se nuk dihet se çelësat e cilës derë janë ato.
“Nuk mund të jap kualifikime për shkak se nuk e kam parë as aktin akuzues, dëgjohet se është parë duke dhënë çelësat e nga ana tjetër dera është qelë me një ose nuk ishte punë çelësash, kushedi të cilës derë i ka dhënë ai nëse i ka dhënë çelësat”, theksoi juristja, Arta Bilalli Zendeli.
Analisti Mersel Bilalli thotë se duhet parë se në çfarë mase ka qenë presioni i ndaj Alimit për të dorëzuar çelësat.
“Duhet të shohim se çka kanë qenë mundësitë e tij reale që të refuzon që ti jep çelësat, sa ka qenë presioni që ka ndikuar psikiqisht te ai. Ndoshta ai presion ka qenë shumë i vogël dhe ai shpejtë ka leshu pe. Prandaj them është çështje e vlerësimit të gjykatës, çdo gjë që themi ne këtu mendoj se është e tepruar”, deklaroi Mersel Bilalli, analist politik.
Ndryshe në Click Plus u fol edhe për fatin e PPS-së dhe bisedimet që po zhvillohen në mes Pushtetit dhe opozitës maqedonase. Analistët vlerësojnë se të ashtuquajturat bomba edhe më tutje duhet të përdoren si dëshmi.
