Ish-kryeministri i Kosovës, Ramush Haradinaj, ka thënë se ka një marrëveshje mes Presidentit serb, Aleksandar Vucic dhe Kryeministrit Albin Kurti, që i ofron këtij të fundit votat e Listës Serbe.
Haradinaj që njihet si më i zëshmi për mosheqjen e taksës, pak më parë në një konferencë për media tha se Kurti me vendimin e tij po i ofron Vucict fitore në zgjedhjet në Serbi.
“Heqja e taksës më 1 prill krejtësisht, pa ksuhte pa vlerë, cilësohet me lutje dhe me pritje që Serbia të jetë konstruktive. Heqja e taksës para zgjedhjeve në Serbi është konstruktivitet i Kurtit që Vucic ti fitojë zgjedhjet”, ka thënë Haradinaj.
Kryetari i AAK’së tutje ka shtuar se kjo u bë me një marrëveshje mes Vucic e Kurtit.
“Shihet që ka një marrëveshje mes tyre, Vucicit e Kurtit, kuptohet votat e Listës Serbe për qeverinë Kurti”, ka thënë ai.
Kujtojmë se Kryeministri Kurti dje propozoi që taksa të hiqet fillimisht pjesërisht, e më pastaj edhe plotësisht për lëndët e para.
Kërkesën e tij e kanë kundërshtuar fuqishëm SHBA’të, ku ambasadori Richard Grenell ka thënë se nuk i pranojnë masat gjysmake të Kurtit.
