Zëvendëskryeministri i parë Artan Grubi beson se po të mos ekzistonte Ali Ahmeti do të duhej ta shpiknin shqiptarët, sepse ai është lideri i kombit. Ai shton se kur Ali Ahmeti flet për të ardhmen e Maqedonisë dhe në atë kontekst për integrimet evropiane dhe konsensus të gjerë partiak, argumentet e tij duhet të dëgjohen seriozisht, sepse përvoja e tij është e madhe dhe askush nga ne në BDI nuk mund të bëjë presion mbi të, transmeton InfoShqip.
“Zoti Ahmeti është një nga figurat e pakta kombëtare, pjesëmarrës në tri luftëra, pjesëmarrës në të gjitha lëvizjet revolucionare të kombit shqiptar në të kaluarën dhe nuk e shoh se kush prej nesh mund t’i bëjë presion zotit Ahmeti. Qoftë Artani, qoftë Bujari apo Kreshniku” - tha Grubi në një paraqitje të ftuar për TV Clan.
Sipas tij, është e rëndësishme të krijohet një front i madh politik pro-evropian për t’u përballur me forcat anti-evropiane. Grubi thotë se nëse Aleanca për Shqiptarët hyn në Qeveri, askush nuk duhet të largohet, as Alternativa.
“Pikërisht kjo ishte arsyeja që Alternativa e Afrim Gashit të hynte në Qeveri vitin e kaluar. Pse Alternativa do të hiqte dorë tani nga pushteti për ndonjë funksion pak a shumë, kur sërish është në pyetje procesi pro-evropian? Si mund ta braktisë procesin në gjysmë të rrugës vetëm për një ose dy arsye? Qytetarët shohin dhe kritikojnë se në një periudhë të caktuar për shkak të një ministri apo drejtori është dëmtuar një proces kaq i rëndësishëm siç është integrimi i vendit në BE“- tha Grubi./InfoShqip.com
