Kandidati për kryeministër nga VV, Albin Kurti, ka thënë se është i gatshëm për koalicion me LDK’në dhe se e sheh vetëm këtë parti si partner të mundshëm, kjo pas mundësisë se vendi mund të shkojë në zgjedhje nëse nuk krijohet sa më parë Qeveria.
Kurti sot në Mbledhjen e Këshillit të Përgjigjshëm të VV’së, tha përmendi edhe një herë se është i gatshëm për koalicion me LDK’në.
Kështu u bë e ditur përmes një komunikate për media nga Vetëvendosje.
“Albin Kurti theksoi edhe një herë vendosmërinë dhe përkushtimin e Lëvizjes për ta përmbushur mandatin që votuesit na e dhanë, duke parë si partner të vetëm për koalicion Lidhjen Demokratike të Kosovës”, thuhet në komunikatë.
Njoftimi i plotë:
Siç është tradita, kryesuesi i Këshillit, Hydajet Hyseni ftoi që të mbajë fjalën hapëse kryetari i Lëvizjes, Albin Kurti. Ai shpjegoi se si viti që po mbyllet ka qenë vit i humbur, nga këndvështrimi i interesave shtetërorë të Kosovës. Një qeverisje e paaftë dhe e kapur, ka shënuar dobësim e regres si në politikën e jashtme ashtu edhe në sferat e brendshme të zhvillimit ekonomik, drejtësisë, arsimit e shëndetësisë.
Por nga aspekti i perspektivës, viti i shkuar ishte i rëndësishëm, sepse edhe një herë Lëvizja VETËVENDOSJE! shënoi rritje elektorale, duke dalë sërish e para e duke fituar të drejtën për të themeluar qeverinë. Albin Kurti theksoi edhe një herë vendosmërinë dhe përkushtimin e Lëvizjes për ta përmbushur mandatin që votuesit na e dhanë, duke parë si partner të vetëm për koalicion Lidhjen Demokratike të Kosovës.
Këshilli i Përgjithshëm përshëndeti dy aktivistët, Glauk Konjufcën dhe Arbërie Nagavcin, të cilët u zgjodhën nga Kuvendi i Kosovës si kryetari e nënkryetarja e organit më të lartë të Republikës. Më pas vijuan diskutimet e debatet mbi situatën politike, sfidat e brendshme e ato rajonale, si dhe u shtjelluan nevoja për përforcime strukturore të Lëvizjes, për të fuqizuar pjesëmarrjen e grave, të rinjve e mërgatës.
