Ministri i Jashtëm i Francës, Jean-Yves Le Drian, ka akuzuar Australinë dhe SHBA-në se kanë gënjyer për një pakt të ri sigurie që bëri që Parisi të tërhiqte ambasadorët nga këto dy vende.
Në një intervistë për televizionin France 2, Jean-Yves Le Drian akuzoi gjithashtu vendet për “mashtrim, një shkelje e madhe e besimit dhe përbuzje”.
Pakti, i njohur si Aukus, do t’i japë Australisë teknologjinë për të ndërtuar nëndetëse me energji bërthamore. Ky veprim pengoi një marrëveshje shumë miliardë dollarëshe që Franca kishte nënshkruar me Australinë.
Marrëveshja, e cila gjithashtu përfshin Britaninë, shihet gjerësisht si një përpjekje për të kundërshtuar ndikimin e Kinës në Detin e kontestuar të Kinës Jugore.
Franca u informua vetëm disa orë para se të bëhej njoftimi publik në fillim të kësaj jave. Le Drian paralajmëroi se një “krizë serioze” ishte në progres midis aleatëve.
