Nënkryetari i Lidhjes Demokratike të Kosovës (LDK), Lutfi Haziri, ka reaguar ashpër ndaj deklaratave të fundit të ministres serbe, Snezhana Paunoviq, lidhur me pretendimet për “spastrimin e Kosovës”, përcjell agjencia e lajmeve INA.
Përmes një reagimi publik, Haziri ka thënë se deklaratat e tilla 27 vjet pas luftës tregojnë vetëm “merakun” e mbetur të Beogradit zyrtar, ndërsa ka numëruar dështimet historike të Serbisë për shfarosjen e shqiptarëve.
Në reagimin e tij, Haziri ka sjellë në vëmendje planin famëkeq genocidal “Patkoi”, duke thënë se kjo ishte përpjekja e dështuar e kasapit të Ballkanit, Sllobodan Millosheviq.
Haziri ka bërë një retrospektivë historike, duke vënë në dukje se projektet serbe për spastrim etnik mbi Kosovën kanë dështuar sistematikisht.
Postimi i plotë:
Mos u merrni me dëshirat e ministrave dhe kryeministrave serbë, t’i kthehemi bashkëpunimit e dialogut për të shkaktuar procese e të relizojmë ëndrra për bashkimin e shqiptarëve!
Përkitazi me deklaratën e ministres serbe, Snezhana Paunovic, për ‘spastrimin e Kosovës’, nuk duhet të harrojmë që ‘opercacioni patkoi’ ka qenë pikërisht për spastrimin etnik të Kosovës, që shefi i saj dhe popullit serb, Milosevic, ka provu por ka deshtu,
Me dalë kjo deklaratë 27 vjet pas luftës, është veç me i mbetë merak dikujt.
Sa për rikujtim, kjo është hera e pestë për 120 vjet që serbët kanë dështu në spastrimin etnik të Kosovës.
Mos u merrni me dëshirat e ministrave dhe kryeministrave serbë, por t’i kthehemi bashkëpunimit e dialogut të brendshëm në Kosovë, që të shkaktojmë procese e të relizojmë ëndrra për bashkimin e shqiptarëve.
Republika e Kosovës është projekt i përhershëm, e cila bashkon shqiptarët dhe bëhet urë e pajtimit të popujve ballkanik.
