Pasi Donald Trump fitoi zgjedhjet presidenciale në SHBA, pavarësisht se me 2.7 milionë vota më pak se rivalja Hillary Clinton, pati shumë media që deklaruan se një faktor i këtyre zgjedhjeve ishin edhe lajmet false të përhapura në rrjetet sociale.
Një ditë më parë, BBC ishte në qytetin e Veleshit në Maqedoni, ku të rinjtë e kishin kthyer në biznes fitimprurës prodhimin e lajmeve false për fushatën amerikane.
Ndërkohë, një nga ndihmësit e Donald Trump ka humbur punën e tij pasi shpërndau një teori konspirative, e cila kulmoi në fundjavë me një shkëmbim zjarri në një piceri.
Michael Flynn, 33 vjeç, u largua nga ekipi i Trump pasi shpërndau lajmin fals për atë që njihet si “Pizzagate” në SHBA.
Babai i tij, Michael Flynn Snr është përzgjedhur nga Trump për këshilltar të sigurisë kombëtare.
Edhe ai e ka shpërndarë lajmin fals.
“Pizzagate” prodhoi të dielën një ngjarje të rëndë, kur një person i armatosur qëlloi brenda picerisë “Comet Ping Pong”.
Për fat askush nuk u plagos.
Por çfarë është “Pizzagate”?
Në kulmin e fushatës elektorale, dikush nga e djathta ekstreme përhapi një lajm online se ekziston një rrjet pedofilësh demokratë, që e zhvillojnë aktivitetin e tyre nëpër piceri, më e njohura prej tyre “Comet Ping Pong”.
Sipas teorisë konspirative, në këtë rrjet pedofilie është përfshirë edhe Hillary Clinton dhe një prej ndihmësve të saj, John Podesta.
I dyshuari që qëlloi në restorantin “Comet Ping Pong” tha se kishte shkuar të investigonte vetë këto dyshime.
Pronari i kësaj picerie është donator i demokratëve.
Sipas teorisë konspirative, kodi për aktet seksuale më fëmijë në bodrum është ‘djathi’, ‘pica’, ‘hot dog’, etj.
Pronari i picerisë thotë se ata nuk kanë bodrum. Mbi të gjitha, ata kanë marrë shumë kërcënime me jetë. /mapo
