Kundërshtimi që ka ardhur sot nga sekretari i NATO-s dhe Ambasada e Shteteve të Bashkuara të Amerikës (SHBA), në Prishtinë, nga njohësit e politikës dhe sigurisë po shihet në mënyra të ndryshme.
Analisti Imer Mushkolaj, mendon se as presidenti dhe as kryeparlamentari i Kosovës, nuk marrin ndonjë veprim në drejtim të themelimit të transformimit të FSK-së, pa e pasur një marrëveshje paraprake me ndërkombëtarët.
Ai ka theksuar për Telegrafin se ekziston gjithsesi një pajtim – qoftë edhe i heshtur.
“Tash kur krijimi i ushtrisë së Kosovës me ndryshime kushtetuese është i pamundur, shkaku i mospajtimit të deputetëve serbë, respektivisht Beogradit, kjo mbetet e vetmja rrugë. Reagimet nga Brukseli e Washingtoni janë të pritshme, por procesi duhet çuar përpara”, ka shtuar Mushkolaj.
Njohësi i çështjeve të sigurisë, Naim Maloku, ka theksuar për Telegrafin se kërkesa që FSK-ja të transformohet në ushtri të Kosovës – nga ana e ndërkombëtarëve – përmes ndryshimeve kushtetuese, ekziston tash e katër vjet.
“Në një kohë kur e kishim mundësinë që t’i plotësonim kërkesat e serbëve që tu shtohej edhe një mandat i rezervuar, në këmbim të votimit të ndryshimeve kushtetuese përmes të cilave do të formohej ushtria e Kosovës, liderët e partive kryesore nuk patën pranuar”, ka shtuar Maloku.
Sipas tij, ka qenë Hashim Thaçi, Isa Mustafa, Albin Kurti dhe Ramush Haradinaj, ata të cilët nuk pranonin që të bëhej ky këmbim i kërkesave, dhe ja tash ku jemi.
“Deputetët serbë në Kuvendin e Kosovës nuk do ta votojnë ushtrinë”, ka shtuar Maloku.
Ndryshe, sot ka reaguar sekretari i NATO-s dhe Ambasada e SHBA-ve, duke e kundërshtuar iniciativën e djeshme të presidentit Hashim Thaçi për projektligjin për ndryshimin e misionit të FSK-së. /Telegrafi/
