Takohen në natyrë, Merkel dhe Putin “qajnë hallet e botës”

Presidenti rus Vladimir Putin dhe kancelarja gjermane Angela Merkel u takuan dje pasdite jashtë Berlinit, për bisedime që variojnë nga konfliktet në Ukrainë, Siri dhe Iran, deri te projekti i gazsjellësit që ka nxitur zemërimin e SHBA-së.

Duke qëndruar pranë Putinit, Merkeli tha se të dy vendet, por sidomos Rusia si një anëtare e përhershme e Këshillit të Sigurimit të Organizatës së Kombeve të Bashkuara, kishin një përgjegjësi për të trajtuar këto probleme, shkruan Top Channel.

Ajo tha se kishte planifikuar të ngrinte çështjet e të drejtave të njeriut me Putinin dhe të diskutonte marrëdhëniet dypalëshe, të tendosura që prej aneksimit të rajonit të Krimesë në Ukrainë, nga ana e Rusisë në vitin 2014.

“Unë jam e mendimit se çështjet e diskutueshme mund të adresohen vetëm te dialogu dhe të zgjidhen vetëm përmes dialogut”, tha ajo.

Të dy liderët ngritën shqetësime rreth Sirisë dhe gjendjes së vështirë të refugjatëve të shumtë, të krijuar nga lufta shtatëvjeçare atje. Merkeli tha se ishte e rëndësishme të shmangej një krizë humanitare në Idlib, Siri dhe rajonin përreth, ndërsa theksoi se ajo dhe Putini kishin diskutuar tashmë çështjen e reformave kushtetuese dhe zgjedhjet e mundshme, kur u takuan së fundi në Soçi në muajin maj.

Putini u tha gazetarëve se duhet bërë gjithçka për të ndihmuar refugjatët sirianë të kthehen në vendin e tyre dhe se Siria ka nevojë për ndihmë për rindërtimin.

Sa i përket Ukrainës, Merkeli tha se shpresonte që të bëheshin përpjekje të reja në fillim të vitit shkollor, për të shmangur forcat ushtarake dhe separatistët ukrainas në linjat e para në rajonin Donbass.

Për tubacionin e planifikuar Nord Stream 2, për të transportuar gazin rus nën Baltik, me destinacion Gjermaninë, Merkeli tha se Ukraina duhet të vazhdojë të ketë një rol në tranzitin e gazit në Evropë dhe përshëndeti fillimin e diskutimeve midis Bashkimit Evropian, Ukrainës dhe Rusisë për këtë çështje.

Putini u tha gazetarëve se një veprim i tillë duhej të kishte kuptim nga perspektiva e biznesit. “Do të doja të theksoja se gjëja kryesore është se tranziti ukrainas, i cili është tradicional për ne, i plotëson kërkesat ekonomike”, tha ai.

Shtetet e Bashkuara po e shtyjnë Gjermaninë të ndalojë punën në tubacionin nën Baltik, duke argumentuar se kjo do të rrisë varësinë e Gjermanisë nga Rusia për energji.

Ukraina ka frikë se tubacioni do të lejojë Rusinë të shkëpusë atë nga biznesi i tranzitit të gazit, ndërsa fqinjët e Evropës Lindore të Gjermanisë, të shqetësuar nga shkeljet e Rusisë, kanë ngritur shqetësime rreth projektit.

Putini mbërriti në Gjermani të shtunën mbrëma pas një ndalese në një fshat austriak për të marrë pjesë në martesën e ministres së jashtme Karin Kneissl me sipërmarrësin Wolfgang Meilinger.


PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu