SHBA-të kanë bërë edhe një hap për hapjen e rrugës për anëtarësimin e plotë të Maqedonisë së Veriut në NATO. Sekretari shtetëror amerikan Majk Pompeo sot përmes tuiterit njoftoi se SHBA-të kanë deponuar Protokollin e ratifikuar.
“Me kënaqësi ju njoftoj se SHBA deponuan protokollin e ratifikuar për anëtarësimin e Maqedonisë së Veriut në NATO. Një hap më afër deri në pranimin e Maqedonisë së Veriut si aleatja e 30-të e NATO-s”, theksoi sekretari amerikan i shtetit, Pompeo, përcjell INA. Senati amerikan më 22 tetor të këtij viti ratifikoi protokollin për anëtarësim. Deri tani protokolli është ratifikuar nga 28 prej 29 vendeve anëtare, ndërsa ka ngelur vetëm Spanja.
