Edhe gjysmë vjetori parë i këtij viti shkollor i gjeti të pa zyrtarizuar emrat e shkollave “Imri Elezi” dhe “Ismail Qemali” në Çair. Nuk përjashtohet mundësia që edhe viti shkollor të mbyllet pa zgjidhjen e këtij problemi disa vjeçar, shkruan Alsat-M. Ministria e Arsimit ka shtuar numrin e arsyeve përse nuk janë zyrtarizuar emrat.
Pavarësisht se çështja e emrave të shkollave në Çair daton që para krizës politike, ministri i Arsimit, Pishtar Lutfiu thotë se kriza politike dhe formimi i Qeverisë se re ka lënë pezull përfundimin e kësaj çështje. Ndërsa dhe këmbëngul se emrat e shkollave duhet zyrtarizuar, por duke mos precizuar kur.
Problemi i kamotshëm i zyrtarizimit të emrave të shkollave, disa herë ka nxitur edhe revoltën e prindërve si iniciues, të cilët janë kërcënuar edhe me bojkot të procesit edukativo arsimor. Edhe pse në shkollat janë vendosur tabela me emrat “Ismail Qemali” dhe “Imri Elezi”, nxënësit e këtyre shkollave dëftesat vazhdojnë t’i marrin me emrat zyrtarë, ashtu siç jepen edhe të gjithë dokumentet tjera të lëshuara nga këto shkolla.
