Ushtria izraelite njoftoi sot se ka nisur ofensivë ushtarake në tre blloqe të Rripit qendror të Gazës dhe ka mbyllur pjesë të rrugës Salah al-Din, pavarësisht armëpushimit që është në fuqi që nga tetori i vitit 2025, transmeton Anadolu.
Shkeljet izraelite, që nga hyrja në fuqi e armëpushimit më 10 tetor 2025, kanë shkaktuar vdekjen e 1.650 palestinezëve dhe plagosjen e 5.975 të tjerëve, sipas shifrave të publikuara të hënën nga Ministria e Shëndetësisë në Gaza.
Koordinatori i Aktiviteteve Qeveritare në Territore (COGAT) i ushtrisë izraelite deklaroi në një postim në Facebook se “ushtria ka filluar një operacion ushtarak në Rripin qendror të Gazës, pranë ‘vijës së verdhë’, konkretisht në zonat e shënuara me numrat 660, 661 dhe 666”.
Ata pretenduan se operacioni kishte për qëllim atë që e përshkruan si “infrastrukturë terroriste”. “Gjatë operacionit, rruga Salah al-Din do të jetë e mbyllur në blloqet e përmendura më lart”, njoftoi COGAT.
Ata u bënë thirrje palestinezëve të qëndrojnë larg zonës “derisa zëdhënësi i ushtrisë izraelite të japë një njoftim zyrtar për përfundimin e operacionit”. Zyra nuk dha detaje të mëtejshme mbi natyrën apo kohëzgjatjen e pritshme të operacionit.
Armëpushimi në Gaza hyri në fuqi si pjesë e fazës së parë të planit të presidentit amerikan Donald Trump, i cili synon t’i japë fund gjenocidit izraelit në këtë enklavë. Në kuadër të fazës së parë, ushtria izraelite u tërhoq në atë që njihet si “vija e verdhë” brenda Gazës.
Izraeli vazhdon të mbajë të pushtuar rreth 70 për qind të Rripit të Gazës ndërsa shumica e palestinezëve janë përqendruar në zona jashtë territorit të kontrolluar nga Izraeli.
Që nga tetori i vitit 2023, gjenocidi i Izraelit në Gaza ka vrarë më shumë se 74 mijë palestinezë dhe ka plagosur mbi 176 mijë të tjerë, shumica e të cilëve janë gra dhe fëmijë. Lufta ka dëmtuar ose shkatërruar rreth 90 për qind të infrastrukturës së Gazës ndërsa OKB-ja i ka vlerësuar kostot e rindërtimit në rreth 71,4 miliardë dollarë.










