Paraqitja e kryeministrit Haradinaj në TV Happy të Beogradit ishte turpëruese për shtetin e Kosovës dhe qytetarët e saj. Një koment të tillë e bëri pak më parë edhe gazetari nga diaspora, Enver Robelli – transmeton Periskopi.
Por, nëse shohim komentet e bëra nga serbë të ndryshëm në YouTube, ilustrohet edhe më mirë paraqitja skandaloze e kryeministrit dhe poashtu urrejtja e madhe e tyre ndaj etnisë shqiptare.
I pari që shfaqet në seksionin e komenteve thotë pakashumë kështu: “Momenti më i fortë në intervistë është kur Haradinaj thotë se Kosova nuk ka politikë të jashtme, por Shtetet e Bashkuara po e udhëheqin atë. Atëherë çfarë përfaqëson fjala “e pavarur” e Kosovës?” Ky koment i ka marrë 80 pëlqime, dhe në të vërtetë, logjikisht është i drejtë.
Një tjetër komentues thotë se Haradinaj vërehet nga fytyra që është neandertal. Komentet raciste janë me bollëk – por është e pakuptueshme nevoja e kryeministrit për t’u turpëruar në këtë mënyrë.
Ka edhe komente tjera të cilat thonë se Haradinaj flet një serbishte të çalë, me shumë vështirësi.
