Një tjetër projekt ambicioz në Dubai, aty nuk rreshtin çudirat urbane dhe akritektonike. Siç shkruan CNN, ndryshe nga rrokaqiejt më i lartë apo pishina më e thellë, projekti i fundit i propozuar nuk është vetëm një arritje arkitekturore, por edhe një fitore për ruajtjen e oqeanit dhe një lëvizje të rëndësishme mjedisore.
Shkëmbinj nënujorë të Dubait – Dubai Reefs, siç vë në dukje CNN, cilësohet si projekti më i madh në botë i restaurimit të oqeanit – nëse ndërtohet, ai do të përbëhet nga 77 milje katrorë shkëmb artificial që do të krijojë një “shtëpi” për më shumë se një miliard korale dhe 100 milionë pemë mangrove.
Planet për projektin u njoftuan këtë javë nga URB, një zhvillues i qyteteve të qëndrueshme me bazë në Dubai, projektet e mëparshme të të cilit përfshijnë një autostradë për çiklizëm në Dubai dhe qytete të qëndrueshme në Egjipt dhe Afrikën e Jugut.
“Shëndeti i qyteteve tona është i lidhur pazgjidhshmërisht me shëndetin e oqeaneve tona,” tha CEO i URB Baharash Bagherian në një email për CNN. “Ne kemi nevojë për një frymë sipërmarrëse në planifikimin e qytetit bregdetar”.
Krahas shkëmbinjve artificialë, URB ka planifikuar shtëpi lundruese, mikpritje, shitje me pakicë dhe shtëpiza të ndryshme eko, të cilat sipas saj do ta bëjnë zonën një destinacion turistik.
Në qendër të projektit do të jetë një institut detar, i përkushtuar për kërkimin e oqeanit dhe mbrojtjen e mjedisit bregdetar të Dubait. Ai gjithashtu do të ofrojë programe arsimore rreth ruajtjes së detit.
URB pretendon se vendi do të fuqizohet nga 100% energji e rinovueshme, e gjeneruar nga energjia diellore, hidroelektrike dhe energjia valore, ndërsa fermat e algave të detit dhe gocave do të prodhojnë ushqim.
Nëse ndërtimi vazhdon, zhvilluesi pret të përfundojë projektin deri në vitin 2040, por vëren se do të përballet me sfida për të siguruar që nisma të mund të financohet plotësisht privatisht dhe të aksesueshme për njerëzit e të gjitha niveleve të të ardhurave.
“Dubai Reefs synon të bëhet një plan për ruajtjen detare, ekoturizmin dhe jetën në oqean”, tha Bagherian. “Përfundimisht, ai do të bëhet një destinacion unik elastik që do të sigurojë siguri ushqimore dhe energji nga oqeani, duke nxitur një ekonomi më të gjelbër”, thekson ai.
