Përfaqësuesi special i SHBA-së për Ballkanin Perëndimor, Gabriel Escobar, tha të mërkurën se SHBA-të do t’i njohin rezultatet e zgjedhjeve në katër komuna në veri të Kosovës edhe nëse serbët i bojkotojnë ato dhe i ftoi ata që të kthehen në institucionet e Kosovës.
Escobar tha për Tanjug, i pyetur nëse zgjedhjet lokale në veri të Kosovës do të ishin legjitime nëse serbët i bojkotonin ato, ai tha se fakti që disa parti politike bojkotojnë zgjedhjet nuk përcakton rezultatet e zgjedhjeve dhe tha se SHBA-të do të njohin rezultatet e zgjedhjeve në çdo rast.
“U kam bërë apel serbëve që të marrin pjesë në zgjedhje. Ne kuptojmë shumë gjëra që ata i shohin si problematike, por duhet patjetër të marrin pjesë. Nëse ata nuk do të merrnin pjesë, kjo nuk do të thotë se ne nuk i mbështesim zgjedhjet. Qeveria e Kosovës ka obligim kushtetues. Do të ketë zgjedhje dhe ne do t’i njohim rezultatet dhe shpresojmë që serbët të kthehen në një moment”, tha Escobar.
Ai tha se SHBA-të po kërkojnë që serbët të kthehen në departamentet e policisë, sepse nuk mund të ketë një komunitet që nuk ka shërbime komunale dhe që nuk ka forcë policore.
“Kemi kërkuar që serbët të kthehen në institucionet e Kosovës që të mos ketë arsye që shqiptarët etnikë të jenë të pranishëm atje. Kjo është një çështje vërtet komplekse. Do të nevojitet një kompromis nga të dyja palët për të gjetur një zgjidhje”, tha Escobar.
Ai theksoi se kërcënimet ndaj komunitetit serb në Kosovë duhet të ndalen “nga të gjitha anët”, në mënyrë që këta njerëz të jetojnë në një “mënyrë paqësore dhe demokratike” në një shoqëri demokratike.
“Djegia e automjeteve dhe e pasurive të paluajtshme dhe kërcënimet ndaj njerëzve që duan të integrohen nuk vijnë nga shqiptarët etnikë, por nga serbët, kështu që mendoj se kërcënimet ndaj komunitetit serb në Kosovë duhet të ndalen nga të gjitha anët”, tha Escobar.
SHBA-të presin që Kosova dhe Serbia të ofrojnë një kornizë kohore për zbatimin e plotë të Marrëveshjes së Ohrit dhe propozimet fillestare për formimin e Bashkësisë së Komunave Serbe (ZSO), tha Escobar dhe vlerësoi se është koha e fundit për formimin e Asocacionit.
“Ne presim propozime fillestare për formimin e ZSO-së, por presim edhe një afat kohor për zbatimin e plotë të Marrëveshjes së Ohrit. Kjo do të thotë se të gjitha palët duhet të vijnë të përgatitura”, tha ai.
Duke komentuar faktin se në 10 vjetorin e nënshkrimit të Marrëveshjes së Brukselit, ZSO-ja ende nuk është formuar, Escobar tha se pajtohet me ambasadorin e SHBA-së në Serbi, Christopher Hill, në vlerësimin se është koha për t’u formuar.
“Ai (Hill) ka të drejtë. Është një detyrim ligjor ekzistues dhe ne e mbështesim. Vitin e kaluar, ne pamë sinjale pozitive në këtë kuptim, para së gjithash falë mbështetjes së bashkësisë ndërkombëtare. Marrëveshja e fundit e Ohrit ofron një afat kohor që palët ta përdorin për të rënë dakord mbi këtë marrëveshje, duke përfshirë ZSO-në. Bëhet fjalë për fillimin e majit, kur palët do të flasin për këtë dhe për detyrimet e tjera ekzistuese”, tha Escobar.
Lidhur me deklaratën e tij të mëparshme se ZSO do të formohet “me ose pa kryeministrin e Kosovës Albin Kurti”, ai tha se ZSO është pjesë e marrëveshjes së Brukselit dhe marrëveshjes së Ohrit, si dhe e planit evropian dhe se kjo është diçka që me siguri do të arrihet në të ardhmen.
“Pyetja e vetme është se deri ku dëshiron të pranojë Qeveria e Kosovës, pra të përqafojë obligimet ekzistuese dhe të vazhdojë. Unë thashë se jam i gatshëm të ndihmoj në krijimin e një dialogu për ta bërë këtë një fitore të favorshme për të dyja palët. Mendoj se këtu nuk duhet të ketë konflikt, por vetëm detyrim”, tha Escobar.
Ai tha se nuk i takon SHBA-ve të vendosin se sipas modelit të formimit të ZSO-së dhe se është në dorën e palëve pjesëmarrëse në negociata.
“Përfaqësuesit e Bashkimit Evropian kanë bërë disa propozime që janë në përputhje me rregullat e BE-së dhe kushtetutshmërinë e Kosovës, por të dyja palët duhet të vendosin se çfarë është më e mira për ta”, ka përfunduar Escobar.
