Për herë të dytë këtë vit, ushtria amerikane po kryen një tërheqje masive të pajisjeve të saj ushtarake nga Arabia Saudite, e cila kryesisht po ndodh larg syve të mediave, shkruan InfoShqip.
Së fundmi SHBA-të kanë tërhequr sistemin e tyre më të avancuar të mbrojtjes raketore Thaad dhe bateritë e sistemit Patriot nga Arabia Saudite, pavarësisht kërcënimit të vazhdueshëm të sulmeve ajrore të nisura nga rebelët Houthi nga Jemeni fqinj.
Ndërsa dhjetëra mijëra trupa amerikane mbeten të vendosura në të gjithë Gadishullin Arabik si kundërpeshë ndaj Iranit, vendet arabe të Gjirit janë të shqetësuara për planet e ardhshme amerikane pasi ushtria e tyre sheh një kërcënim në rritje në Azi që kërkon mbrojtje më të fortë raketore. Tensionet në Lindjen e Mesme mbeten të larta pasi negociatat në Vjenë duket se kanë ngecur mbi marrëveshjen bërthamore të Iranit me fuqitë botërore, duke rritur rrezikun e konflikteve të ardhshme në rajon.
Një imazh satelitor i lëshuar nga Associated Press (AP) në fund të gushtit tregoi se disa sisteme të mbrojtjes ajrore amerikane ishin tërhequr nga Arabia Saudite, nga zonat ku ishin vendosur më parë. Një fotografi satelitore me rezolucion të lartë, e publikuar nga Planet Lab të Premten, tregon se vendet e baterive Patriot janë bosh në vende të caktuara, pa asnjë aktivitet të dukshëm.
Në një deklaratë, të bërë nga Ministria Saudite e Mbrojtjes marrëdhënien e mbretërisë me Shtetet e Bashkuara e përshkruan si “të fortë, të gjatë dhe historike”, madje duke pranuar tërheqjen e sistemeve të mbrojtjes raketore amerikane. “Zhvendosja e disa prej aftësive mbrojtëse të Shteteve miqësore të Shteteve të Bashkuara nga rajoni po kryhet përmes një mirëkuptimi dhe koordinimi të përbashkët të strategjive të mbrojtjes si një atribut i vendosjes dhe disponimit operacional”, thuhet në deklaratë.
Gjithashtu nga Ministria Saudite e Mbrojtjes deklaruan se ushtria saudite është “e aftë të mbrojë tokën, detin, hapësirën e saj ajrore dhe njerëzit e saj”. /InfoShqip.com
