Ndonëse me ditë të tëra paralajmërojnë negociata intensive pas konstituimit të Kuvendit më 4 gusht, partitë politike nuk zbardhin emrat e negociatorëve. Jo zyrtarisht mësohet se bisedimet do të zhvillohen mes nënkryetarëve të partive, por asnjë subjekt nuk konfirmon emrat konkret. LSDM-ja do të negociojë përmes nënkryetarëve Milla Caorska, Muhamed Zekiri, Damjan Mançevcki, Lupço Nikollovski etj. Nga ky subjekt thonë se janë të hapur për komunikim me të gjitha subjektet.
Nga Lëvizja Besa, subjekt ky i cili në zgjedhjeve të 15 korrikut garoi në koalicion parazgjedhor më LSDM-në thonë se për itinerarin e negociatave dhe formatin e grupit negociator do të njoftohemi pas vendimit të marrë në organet e partisë. As VMRO-DPMNE-ja nuk ndan detaje mbi ekipin negociues. Partia e Hristijan Mickoskit jo zyrtarisht mësohet të ketë çështjen e negociatave brenda partisë, por pa caktuar emra konkret. Nga ky subjekt thonë se janë në komunikim të vazhdueshëm me partitë parlamentare.
BDI hesht për emrat e negociatorëve. Ndonëse zëdhënësi Bujar Osmani ditë më parë deklaroi se pas 4 gushtit ekipet negociuese do të fillojnë me punë, partia e Ahmetit nuk tregon emrat përmes të cilëve do të kërkojë pozitën e kryeministrit të parë shqiptar. Nga burime brenda BDI-së, lakohen emrat e Fatmir Besimit, Bujar Osmanit, Izet Mexhitit, Artan Grubit, Teuta Arifit etj.
Ndërkohë koalicionit Aleanca për Shqiptarët dhe Altenrativa nuk do të formojnë grupe për negociata derisa BDI të mos njoftojë se nuk ka arritur ta sigurojë pozitën e kryeministrit dhe të tërhiqet nga gara për të qenë pjesë e shumicës së re parlamentare.
“I kemi dhënë mundësi BDI-së që ta mbaj të vetmin premtim të dhënë para shqiptarëve e që është Kryeministri shqiptar. Nuk do të ishte serioze të bëjmë ekip negociues për sa kohë presim që ata ta mbajnë premtimin”, shprehen nga ASH&AAA.
Seanca konstituive është thirr më 4 gusht. Në mes të muajit gusht pritet besimi i mandatit nga presidenti ndaj kandidatit që arrin të siguron shumicën e votave në Kuvend, ndërsa në fund të muajit pritet votimi i Qeverisë së re.
Video:
