Sipas disa mediave të Beogradit, ka patur episode tensioni në një takim informal të organizuar nga Federica Mogherini me disa udhëheqës të Ballkanit Perëndimor në New York, mes tyre Daçiç e Thaçi.
Madje thuhet se shefja ende në detyrë e politikës së Jashtme të BE-së, është parë të largohet e tensionuar në një moment nga tavolina, e kjo pas një përplasjeje mes ministrit të Jashtëm serb Ivica Daçiç dhe presidentit të Kosovës Hashim Thaçi.
Sipas burimeve në qarqet diplomatike, Hashim Thaçit nuk i pëlqyer fjala e Daçiçit, më saktësisht, pjesa për mospërmbushjen e detyrimeve të tij nga Prishtina, referuar vendosjes së taksës doganore.
“Respektimi i rreptë i kornizave të përfunduara dhe të dakorduara të bashkëpunimit rajonal nga të gjithë pjesëmarrësit në rajon, pa përjashtim, është një parakusht për realizimin e suksesshëm dhe përmirësimin e bashkëpunimit rajonal”, mësohet të ketë thënë Daçiç, fjalë këto që nuk i kanë pëlqyer Thaçit, i cili i ka injoruar me grimasa.
“Thaçi kundërshtoi dukshëm vërejtjet e Daçiçit dhe me një ton të lartë, diplomati serb përsëriti fjalinë: ‘Respektimi i rreptë i kornizave të dakorduara dhe të pajtuara”, zbulojnë mediat e Beogradit. /tesheshi.com/
