Real Madrid – Bayern, e thotë Guardiola kush shkon në finale

Pak prej tyre ishin ata që prisnin që Roma dhe Liverpool të ishin në gjendje të bënin surpriza në Champions, ndërsa tani këto dy skuadra janë “çiftuar” në gjysmëfinalet e këtij kompeticioni, pasi eliminuan respektivisht Barçën dhe Manchester City.

Sfida tjetër mes Real Madridit dhe Bayern Munich përball dy kandidatët e mëdhenj për titullin: “Unë shpresoj se do të kualifikohet Bayerni, – tha Pep Guardiola. – Bavarezët kanë fatin që meritojnë dhe mund të arrijnë finalen”.

Zhgënjimi nga eliminimi i “qytetarëve” vazhdon ende në Manchester, edhe pse Pep nuk ka shumë qortime për ekipin e tij. Për performancën e Mateu Lahoz, megjithatë, po: “Ende po diskutohet nëse ishte apo jo penalltia që kualifikoi Real Madridin. Në këtë kompeticion vendimet e arbitrave dhe detajet e vogla kushtojnë, – këmbënguli tekniku katalanas, i cili nuk dorëzohet, por po bëhet gati për të provuar përsëri. – Sezonin e ardhshëm do të kthehemi më të fortë”.

Për dëbimin nga fusha me karton të kuq, Guardiola ende nuk e kupton se çfarë ndodhi: “Gjyqtari më tha se mund të protestonte në dhomën e zhveshjes, por jo në fushë. Nuk e di nëse kjo diferencë është e mjaftueshme për kartonin e kuq. Do të vazhdoj të kritikoj sjelljen, që ndonjëherë kanë disa gjyqtarë”.

Pasi u “shua” në Ligën e Kampionëve, tani Manchester City është fare pranë sigurimit të titullit kampion në Premier League. “Ne duhet të mos dekurajohemi, sepse kemi mundësinë për të fituar Premier League, që është titulli më i rëndësishëm i sezonit, – shton Guardiola. – Nëse nuk fitojmë me Tottenham, do të jetë më e lehtë për ta mbyllur gjithçka kundër Swansea”.

PËRGJIGJU

Please enter your comment!
Please enter your name here