Analistët: Qeveri shpëtimi, ose LSDM me shqiptarët

Analistët politik thonë se formimi i Qeverisë së ardhshme do të kalojë nëpër një proces jo dhe aq të lehtë të negociatave mes partive. Ata janë të ndarë për koalicionet që do të qeverisin vendit, por janë të njëzërit se një koalicion VMRO-DPMNE dhe BDI nuk do të nxirrte vendin nga kriza. Sipas Agim Jonuzit, zgjidhja më e mirë dhe më e kapshme është një “Qeveri e Shpëtimit” me një koalicion të gjerë të partive ose Qeveri ekspertësh.

“Nuk ekziston qeveri politike e cila në këtë moment mund të jetë funksionale dhe pa pasoja. Shumë më e sigurt dhe më afër reales është teza se në këto moment kërkohen arsye dhe modalitete për instalimin e një Qeverie teknike e cila për jo më gjatë se një vit do të organizojë zgjedhje të tjera të cilat do të jenë reale dhe funksionale”, ka deklaruar analisti politik Agim Jonuz.
Sipas analistit Ismet Ramadani qeverinë e ardhëshmë pritet ta formojë LSDM me partitë shqiptare dhe kjo parti sipas tij do të ketë për detyrë fillimisht çlirimin e institucioneve shtetërore nga partitë. Ai beson se edhe kërkesat e partive shqiptare do të jetë të pranueshme për kreun e LSDM-së, Zoran Zaev.

“Por ajo që është me rëndësi është që të bëhet Qeveri e cila do t’i çlirojë institucionet e shtetit nga kapja e partive politike, reformat të nisin në gjyqësi, të rikthehet një rrugëtim euro atlantik më i sinqertë dhe më i drejtë me mbështetje edhe të ndërkombëtarëve. Kështu që kjo do të jetë ajo mundësia e parë e formimit të Qeverisë”, tha analisti politik Ismet Ramadani.
Duke komentuar idenë e plasuar ditëve të fundit në opinion për një koalicion mes VMRO-së dhe BDI-së, por me një kryeministër tjetër në vend të Gruevskit, analistët thonë se kjo nuk do të paraqes asnjë ndryshim nga qeverisja e deritanishme pasi Gruevski megjithatë do të mbetet në krye të partisë.


PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu